Zbardhet shkaku i vrasjes së Demir Hysenit, në Itali. Pas arrestimit të shqiptarit tjetër, 60-vjeçarit Kujtim Beli, mediat italiane referuar policisë shkruajnë se ai dyshonte se gruaja e tij e kishte tradhtuar pikërisht me viktimën.

Ai dyshonte se Hyseni kishte frekuentuar gruan e tij, me të cilën më pas ishte ndarë dhe ajo aktualisht jeton në Gjermani.

Mediat italiane shkruajnë se ishte pikërisht kjo çështje që çoi në ngjarjen me një viktimë, shkruan Panorama.

Policia ka thënë në konferencë për media se i arrestuari ishte një burrë i dhunshëm, dhe pikërisht ish gruaja, dy vjet më parë e kishte denoncuar për keqtrajtime.

Beli dyshonte se në atë kohë gruaja e tradhtonte me Demir Hysenin, edhe ai i martuar dhe baba i një vajze të mitur.

Pas divorcit në kthimin nga Gjermania, Kujtim Beli është kthyer për të jetuar në Shqipëri, por duket se nuk e ka harruar hakmarrjen ndaj 49-vjeçarit Hyseni. Policia ka arritur të zbulojë se më herët mes tyre është bërë edhe një telefonate, e cila mundësoi edhe zbulimin e autorit te krimit.